Mewujudkan Birokrasi Pemerintah yang Maiq Meres-2
December 10, 2010
Bejorak sasak 2
December 11, 2010

Base Sasak Samanine

[Sasak.Org] Lex gumi sine Base Sasak bau te paran base si belex lamun te gitex lengan luwex dengan si ngadu ye. Kurang lebehne 3000.000 menuse si bebese Sasak. Base Sasak te kadu six dengan utemene lex gumi paer Lombok. Terus si bau belxan le x luar gumi paer bau tesebut Sembewex (Sembwex dait Sembewe deye/bat), Dompu dait Bima, terus Beli dait Jewe.

Selein ino mesi arax transmigran Sasak lex Sulawesi tengex dait laux /baret (Selatan) dait lex si lein lein. Lex Diaspora si paling belex arax lex Malang dait Jogje sengax ito taoxne belajar. Si lex tenex pesah luwex mesi upeme lex Malesie doang lebeh satus yu tau Sasak. Si kuliah lex Eropah, Amerike, Ostrali epemalik lex Asie begelanyat. Wangse Sasak wah mulei tekenal berkat pepadu dait dedare diasporene.
Base Sasak sino beduwe duwe wujud six te paran base jemex jemex tewe bese bilang jelo dei bese si te kedu ngajinin dengan lein. Lamun istilah bese pesahne tesebut bese kolokial dait bese formal.

Jari epe si te sebut bese kasar sino? Ndexne erex aran bese kasar sengax si tetu arax ye sino besen dengan si kenyengkene gedeg, sili, jejotongan, punyah, bowos, kerangrangan, meleteng, jegol, jogang, bekejengil, kurang ajar deit si merex sino.
Terus mbe tauxne pecatu base Sasak si tekelainang miturut geyene muni?. Erex si ngeno ngene dakuxne. Erex si meriax meriku, nggeto nggete, menu meni, meno mene, lamun keto kete tewe kuto kete wah pekere lain. Legux paksexne temang jari catu lain. Pedahal lamun te denger pacu pecu dengan Sengkol tewe dengan Pedemere ndexne erex bendeongkat (vocabulary) si tetu tetu lein siseh (kecuali) ndexne sepire ongkat si sejetine bau te badex maxnene.
Dengan Selong lamunne lalo aning Semabalun tewe Seneru deyen gunung, ndexne perlu nggenti engkune ngeraos pasti ne pede saling ngerti. Dengan Tengex lamunne lalo aning Selong bau endahne ngeraos ngadu cerene mesex. Tetu dengan Selong genne kemos lagux ngerti ye. Maksudte sejatine bese Sasak ino sopox lagux lengane erex istilah pedaleman dait bangsawan sino ite tau Sasak te pecok pecok jari dengan pesah terus selun selun ite muni ndexku puti ngerti base Sasak.
Lamun erex dengan muni sandel terus si lein muni srandel tewe dengan Selong muni betu terus dengan Denggen muni wetu parante ye bebese lein. Pedahal ceren dengn ngeraos te kuesein isix taoxne tepu upeme lex gunung tewe lex sedin segere epe malik lex rerau.
Tulisan ine ngedu bese geyen dengan Selong, cobaxang semeton jari pedasang ye araxke si tetu pesah (asing) lengan ongkat si biese kadunde?. Lamun ne erex cobe de itung ye pire persen beden ongkat si kadunde beleinan geti six bese geyen dengan Selong ine.
Merex ngeno si beu te bedex side lex nengke sine, mudahan te beu ngeraos beloan malik pekere basen papux baloxte si luar biese cantik(indah) dait sugine agen ne beu te turunang tipex pepu beinte lex jelo mudi.
Wallahuaalambissawab
merex ngeno dait ampure
Si ikhlas
HRJ
bandeongkat:
samanine – masa kini
tenex pesah, tanax pesah – luar negeri
pesah – asing
sili- tersinggung
gedeg – geregetan, marah
jejotongan – marah besar dan mengamuk, darah tingi
kerangrangan – marah karena lapar (lapar bawian), mengalami dehidrasi
meleteng – tidak tenang, gelisah dan takut seperti ayam mau bertelur
jegol – agak miring, sayaraf terganggu
jogang- gila
punyah -mabuk
bowos – sakau
bekejengil – sombong, sok

Leave a Reply

Your email address will not be published. Required fields are marked *