Peresmian Bangun Desa IPEBI oleh Bupati Lombok Tengah
March 14, 2011
Pengelolaan pasca kegiatan bangun desa PEBI-KS
March 14, 2011

Chauvinisme Sasak

Rehayu, semeton jari inax amax.

Hazairin R. Junep

Yogyakarta [sasak.org]Waktu ite kodex lex gumi paer ka demente plai berujan ujan bau balang lex lapangan dait bangket. Demen wah jera ujan arax ketempo jelo lex bat, selun selun sugul sabuk teja (pelamgi) melekuk lex atas lolon nyuih sax ganggas ganggas. Lamun kemalem pas wayen dengan matax lex bangket ite girang milu nindox jagax pare sax te geroang. Ite dait batur batur lain seregep bau balang kadu obor jamplung. Lex peteng dedet sax jaox nggax ntep ntep (kunang kunang) doang sax penggitan. Sax paling te indeng lex mase kodex sino ye sabuk teja dait ntep ntep.

Ite bangse Sasak sine bau te paran sabuk teja sax melekuk lex awang (langit). Bewarne warne ruwente lagux sopox. Mbe lengan warne sino, lengan cahye jelo sax nembus aix. Lamun ndex arax jelo dait ndex arax uap aix ndexn mungkin arax sabuk teja sino. Ite semeno juax lamun ite ndex nginem aix gumi Sasak, ndex te bepedeng(berjemur) lex cahye jelo lex gumi Sasak, ite pade ndex jari dengan Sasak. Ino sopox perumpamaan sax bau ite bait jari pelajahan base ite bangse Sasak sino sopox.

Sopox mase lamun ite bingung sengax ndex arax cahye penaox, ite indengang ntep ntep, sax kocet lagu lamun ye kumpul marax inges dait cantik gati penggitax te six cahye kejep meleng ntep ntep sino. Ite pade anak bangse Sasak perlu te tiru ntep ntep agen ite pade bau sekedar sadex cahye sekecot sekecot lagu lamun ite beriuk pasti cantik dait mbau aten dengan sax begitax.

Lex gumi Sasak arax dakuxn sax tesebut Gerakan Anti Menak!. Dengan sax piyax gerakan sino ndexn mungkin dengan sax ndex beduwe kepentingan. Pade isix teroris sax arax lex mbe mebe juax sino ye te piyax kerna arax sax beduwe niat dait hajat sax ye sebox. Sai piyax rempung teroris sino, ye pasti dengan bekuase dait beduwe kepeng. Dengan Amerike piyax rempung teroris agen jari fitnah terus arax alasan ye pribasax dengan sax arax lex gubuk gempeng rempung terorirs sino. Semeno jaux Gerakan Anti Menak, sai malik sax piyax ye selain dengan sax beduwe kepentingan sino. Menak sino asaln lengan base Jawe, barux nengke ye tegentik kadu base Arab. Berembe jage tadahne, dengan menak sino ndexne demenang dengan Arab sengak ye jaux agame lain sax menghapus sekat, sax jari kontra produktif six kemelen dengan menak. Sax wahne dateng Islam, menak Arab otomatis gugur. Lex dalem Islam dengan sax mulia ndexne dengan sax beduwe bande utawe pangket, lagux dengan sax beduwe Ilmu dait takwe.

Mbe asal usul dengan menak sino, ye sino dengan si enak enak utawe base jawene kepenak. Lex saman laex dengan Jawe kawih istilah Raden. Raden sino leman base Sankrit/ Kawi RAHADIAN artine tuan. Mele ite jujur semeton jari inax amax?. Lamun meno, sai sebut ye TUAN?. Pasti panakawan, babu, budak dait dengan sax takluk lex ye. Ndex mungkin side jax muni TUAN lex dengan sax side ndex kenal. Lagux akhirne sebutan Tuan te kawih lex umum. Lamun lex Inggris arax sebutan Lord (land lord), ye pade artine Tuan Tanah maseh. Ape mungkin dengan sax ndex kenal ye bekelek tuan, bau bau tersinggung ye. Kecuali lex keadaan tertentu, sax formal dait dines. Berembe pekare dengan Sasak sax sebut dirixn DATU meno?. Datu sino sebutan fungsionaris, sax melekat lex jabatan. Pade six Presiden saman nane. Berembe jage ntan tadahn selun selun selapux te kelek DATU. Kan jari bejorax dengan. Marax kanak bajang lex internet, muni GAN, DAN, BOS tipax baturn mesak, pedahel ye masi sekolah kanyan. Mbe olex JuraGAN, KomanDAN dait Boss sino?.

Cobax ite bandingan kance titel sax lain sax ndex bangsawan, misaln arax dengan kadu Doktor atawe sax biase Amd. lah. Sai sebut ye kadu titel sino?. Ndexn mungkin, babu atawe anak buah bani bani sadex sebutan marax menu. Apa sebabne?. Kerna titel sino akademis, tekeleot isix pekare keilmuan. Jari dengan sax kanggo ngembeng titel pasti dengan sax luwexan ilmu dait pengalamanne. Ye ampox ite ndex setuju lamun arax batur sax sebut ite mamix. Sengat sax kanggo bekelek mamix cume anak atawe anak saix atawe anak angkat. Mamix sino sebutan diminutif kadu kelek Amax!. Lamun ndex amaxte mesax dung ngkah ite kelek amax, lagux nane ye wah jari gaye base marax GAN, DAN dait BOSS senuxn.

Bahaye sax belex gati lamun arax dengan sax mengelitkan diri jari rempung bepilah (excluisve) ye sino Chauvinisme. Laex lex Perancis antare 18560-70 saman Napoleon kentel gati chauvinisme sino terus indengang saman Hitler 1933-45, selapux bangse lain ye anggep khewan. Sin matex dengan Yahudi dait selain bangse Arye. Lex gumi paer sine, wah biase te gitax dait dengah dengan besiax pekare dengan merarik antare sax elit sax sebut dirixn Menak lawan dengan sax dengan Menak sebut jajar karang. Sai bani bani sebut dengan Jajar Karang lamun ndex dengan Rasis. Segerah dengan Sasak sax beriman beradat game semel sebut semeton jarin Jajar karang. Lex Lombok Timur arax sax wanenan laex sebut dengan lain RAMBAN BIAX. Sang wah ndex arax dengan sax inget, ape ramabn biax sino. Ramban artine lolo sax ngelos marax ambon, antap, komak, uwi dst. Biax sino sejenis seserot manuk atawe lolo sax genit gati. Lamun te lamper ye pasti ite betelinjax linjax, terus ngingix six genitn. Jari tetu tetu arax kejarian base rempung dengan sax elitang dirxn sino rasis. Berembe bae ampox te sebut semetonte sax lain hine dine cume pekare ye lain dait miskinan utawe bongohan. Lamun lex Amerika wah suwe ndexte kanggo kena Negro, sai bani kena meno jaxn te penjarax. Negro yesino base Spanyol sax artin Bideng. Ndexn salax lagux haram tesebut sengax mengandung arti lengex. Adexn sax tehormatin harus te muni African American!. Ye ampoxn besepakat inax amax papux baloxte lex Lombok Timur, beriux menghapus titel titel sino jari tulax jox aran asli Inax, Amax, adix, kake, pisax, saix, sodet, papux balox dst. Mun paran sax sangkep bait keputusan sino sai?. Ye sino datu belex belax, ndex dengan sembrangan. Lagux keputusan sino ndex maksax sai sai, cume masalah moral, sai sax male gawex sai sax ndex mele ndex masalah.

Keputusan sax dramatis dait revolusionis sino luar biase pengaruhn, ite bangse Sasak jari besopox, ye ampoxte beduwe tuan guru Pancor sax ndex kawih titel ape ape lagux tehormat isix tau Sasak. Terus sax lain keuntungan ye sino ite ndex wah sebut kelompok elit sax lalo undang penjajah Kulande tame lex Lombok, dait luwex pakare sax te gawex isix dengan elit ite beriux bait jari tanggung jawab bareng bareng utawe ite sebut DOSEN tite pade. Nane lamun arax rempung dengan sax sebut dirixn menax berarti ye tulax jox saman penjajahan, sengax titel titel sax ye maux sino terutame te kawih isix penjajah agen ite pecah belah terus ite besiax kance semeton jarinte mesax. Aneh te beriux pikirang berembe agen ite pade ngkah berpecah belah. Sax Elit ngkah kelebihan sax ndex elit biase biase bae. Prinsipte jamax jamax yesino Demen ante demen aku, susah ante susah aku, ite sine sopox pendait. Maeh te bareng butengang harkat martabta bangse Sasak sak beduwe ilmu atas, sax beduwe akhlak muliye dait sax demen beramal sholeh. Amin.

Wallahualambissawab

Selamet dait rahayu.

Sax Ikhlas

Hazairin R. JUNEP

Leave a Reply

Your email address will not be published. Required fields are marked *