Nyale

Website Instan

nyale[Sasak.Org]  “Eleq jaman laeq arak sopok cerite. Araq aren Putri Mandalika. Solah rue, solah base, solah ate. Lueq terune kemeleq Putri Mandalika jari senianaq, laguk Putri Mandalika ndeq mele sepaxang terune-terune no sengax mun ye pilen salaq saiq. Timbang jaxn jari tumpahang daraq sengax iye terebutang, Putri Mandalika buang diq ajok segare. Wah’n seno begentixn jari Nyale”

Saq tiyang masi kodeq, meno unin papuq nine girang bewewaran se’endeq man tyang pirem. Wewaran putri Mandalika. Wewaran saq berembe betuturan pekare sopoq putri saq enges dait jeneng gati.

* * *
Kemalem nini, tyang tokol leq berugak. Bulan purname kemos bae saq gitaq tyang mesaq-mesaq betelejo sampix enget leq sopoq dedare saq enges endah. Dedare Kaliantan, iye biase te empoh Baiq Mandalika. Dedare saq uwah pelet angen tyang siq solah base, solah rue dait solah ate ne. Pokokne solah selapuxn. Lamun maraq unin dengan iye saq te sebut solah luah-dalem.

“Adu idiq gamaq ariq, angkaq’n side doang saq tyang enget” besoraq bae ate kodeq tyang.

“Be, Munir. Pengkura po momot-momot ompok-ompok `i tini?. Onyaq ke ite, lueq bakeq liwat laun epe te `i mpepes-pepesin ne no!” logat Selaparang saq kentel gati selun-selun nagetin tyang leman muri.

“Ai, epe ni Wahab, girang pe `i miaq ite taget. Bengak po pe demen aloq?. Be maraq `i nggitaq pe wah, yaq ku ngkura-ngkura, entah ku tokol ndaraq ku gawek nene” tyang bales pekeotan Wahab, batur tyang saq paling rapet niki.

“Be toang tyang ho pe tokol jaq, laguk maksud tyang no, epe po `i mpikiran pe nini?. Terang te dedare jeneng leleq Kaliantan nono no?, Wahab bekemasan maliq beketoan. Timaq lueq godeq nyingklang, sekeq doang betali rante. Timaq lueq taoqku girang, sekeq doank penyedaq ate’”, beterusan Wahab belelakaq eleq julun tyang.

Tyang tedoq doang, palingan entah kemos-kemos ndenger Wahab beceloteh mesaq-mesaq.

Pikiran tyang malik lalo tipaq Baiq Mandalika. Mulai maliq enget leq penenteng ne saq maraq unin lagu Iwan Fals maraq bola pimpong, pemuaq saq bolet oval maraq unin papuq nine jaq bolet amaraq telok bebek, dait maraq unin dengan barat saq ye te sebut aran perfect, jage.

Wah saq meno, tyang mulai enget berembe sopoq jelo pertama kali tyang berempoh dait Baiq Mandalika. Jelo saq endeq uwah bau tyang lupaq jangke nane. Jelo saq seolah-olah tyang bedait tangket putri Mandalika saq maraq leq dalem wewaranan papuq nine. Jelo ne no, jelo dengan bereroahan bau nyale leq Kaliantan, pante saq te sebut leq dalem wewaran taoq putri Mandalika bolang diriq. Wah’n bedait jelo no, tyang dait Baiq Mandalika bekenalan. Wah’n selang 2 minggu, entah berembe bae selun-selun maraq araq sopok perasaan eleq dalem aten tyang. Meno bae Baiq Mandalika, kebilang bedait bareng tyang selun-selun bae pemuaq’n berubah jari beaq. Lamun maraq base Indonesia no jak merona dait berseri-seri unin.

“Be, epe ni, ta lawan ngeraos no pe tedoq masinan, yaq pe anggep ahkali ite araq `i tene”, uwah 2 kali Wahab nyedaq pengelamunan tyang.

“Mah no, sampun maaf mun ne nggeto jaq. Kenan tyang yaq ndarak dengan leleq tengonek itene” tyang tanggepin pengomehan Wahab kadu pejoraq’an.

“Munir, jemaq te lekaq Kaliantan te!”
“Ta ngkura po `i keto no?” tyang beketoan

“Be ta lalo milu bereroahan Bau nyale. Ba tekan sampix pe melet bedait tangket Baiq Mandalika pe ka” Wahab bejawab

“Ai, yak tyang semel, semeton. Be ntoang pe Baiq Mandalika nono anak dengan sugi dait jak gese keturunan bangsawan, be mun tyang jak anak amaq kangkung gin ne pantes bae ke bareng dedare `i jaoq derajat te nono” sendu bae tyang tanggepin unin Wahab.

“Be semeton i aren angen nono jak yak ne peduli anak amaq kangkung ke, iyang ke, anak mamiq ke, iyak ke, `i peren no angen pe po pada”

“Nggih, laguq ntoang pe budaye te maraq kumbe. Baiq bedait Lalu, Denda badait Raden, be ite `i anak amaq kangkung jak harus cukup dait tangket `i pada-pada dedare anakan amaq kangkung gese. Baiq Mandalika jak jaoq laloq mun harus tyang harepang”

“Be terserah epe kah mun ne nggeto jaq. Be epe bae ta mikirang kumbe bagusne. Laguq jemak jaq tetep te lalo lekaq Kaliantan. `A melet tyang bereroahan Bau Nyale nene”.

Bekemasan bae tyang nyetujuang kemeleq Wahab. Sementare seno aten tyang selun-selun besesurak ndek’n keruan. Sedi kanan terus doang nyimpen perasaan ajoq Baiq Mandalika sementara saq kiri terus besesuraq ndek’n kanggo kemeleq Baiq Mandalika sebab antare tyang dait Baiq Mandalika te pisahang dait jurang stratifikasi sosial saq dalem gati.

***

“Nenek kaji kuase. Be gin bagus segare Kaliantan nene po, Munir” Munir belelemposan ngucap kagum seuwah’n kami sampe eleq Kaliantan.

Mule solah gati Kaliantan sine. Gres saq poteq. Suasane saq adem leq bawaq lolon nyiuh, ombaq bepaleq-paleq’an, segare saq guwah gati maraq entan karpet saq te bentangang.

“Muniiiir” sopoq suare besesuraq leman jaoq ngempoh tyang. Pas tyang gitaq ternyata Habib wah berari leman jaoq, beterusan dateng jok deket tyang.

“Berembe kabar side, batur?”

“Alhamdulillah sehat gati, batur. Side berembe”? unin tyang beketoan maliq.

“Alhamdulillah gati, sehat tyang endah” Habib bejawab

Beterusan saq uwah’n saling beketuan keadaan, Habib tyang kenalaq joq Wahab.

“Wahab, Habib nene anaq leleq amaq rarin tyang, kebetulan bae iye sekeluarga endot pin Kaliantan nene” unin tyang tipaq Wahab mekenalang Habib.

“Habib, sine Wahab. Batur tyang leman Selaparang” unin tyang maliq tipaq Habib, mekenalang Wahab.

Wah’n seno Habib dait Wahab besalaman
“Mbe me laiq tiye Habib?” tyang beketuan joq Habib

“Tyang laiq inaq kaka, tyang lalo singgaq sapuq. Te kadu nyongkolan baeh bih asar”

“Aneh, sai bae nyongkolan musim bau nyale mene?”
“Baiq Mandalika no dait Lalu Malik”
“Baiq Mandalika saq embe?”
“Baiq Mandalika bije Mamiq Qodri. Saq pemuaq’n solah gati seno”

O, neneq kaji. Seuwah’n denger jawapan Habib, kentok tyang maraq rase te siram kadu aiq sebie, panas gati. Aten tyang maraq idap te bacoq. Suare’n Habib bejawap bae maraq idap teker saq tyang dengah.

“Baeh laiq Baiq Mandalika dait Lalu Malik nyongkolan. Ruahan sembilan ruahan bau nyale. Ruahan beleq gati dengan Kaliantan sine jaq. Wah’n seno baeh kelelem dengan bejanggeran leq te, Munir” belo gati Habib becerite laguq cerite seno marax ndeq tyang dengah sebab aten tyang maraq irap gin nyurak nangis. Mule sakit gati berangen tipaq dedare saq endek’n sederajat. Mele sugulang gejolak aten ndek’ke semel. Mele nyampeang perasaanpun tyang dongaq diriq.

* * *

Kemalem sine rame gati. Laguq redup saq tyang perasaq’n. Eleq julun bale Baiq Mandalika saq deket Kaliantan te penoq’ang isiq dengan bejanggeran. Te iringin endah kadu cilokaq sasak, sementara dengan saq dateng manto milu ngibing.

Leman jaoq tyang perhatiang selapux ruen keramean no. Laguq saq paling tyang perhatiang, Baiq Mandalika dait Lalu Malik saq tokol dengan due eleq atas kuade. Jeneng gati Baiq Mandalika kemalem sene sementaren tyang pasrah eleq keadaan. Tawakkal bae Neneq pasti uwah araq rencane saq jaoq lebih solah tipaq tyang. Mule sakit tetu berangen eleq dengan saq mustahil tyang mauq.

Tyang lalo ajoq sedin segare. Beboteng, besedakep ngandangin segare saq guwah gati. Sementare seno leman jaoq masih sayup kedengeran lantunan cilokaq roahan nikahan Baiq Mandalika.

Selama sine bayangan Mandalika terus doang araq eleq pikiran tyang leman kodeq tyang kagum eleq putri Mandalika. Seuwah’n bajang tyang kagum eleq dedare saq te’empoh endah aran Baiq Mandalika. Mule gati saq aran Mandalika selalu doang tyang kagumin, eleq solah rua solah pribadi.

Leman kejaoq’an eleq segare saq guwah, antare nyate dait maye tyang saksiang putri saq enges gati beboteng eleq atas segare, pakaian poteq, solah pemuaq, dait kadu mahkota eleq atas otak ne. Seuwah’n kemos, sekejep bae putri no langsung ilang. Begentik jari nyale saq selun-selun uwah kumpul begere”, mbolan eleq naen tyang. Ruen maraq longe bewarne coklat, beaq, ijo dait araq endah kekuning-kuningan.

* * *

Oleh Eva Mawinda Widiyastantia, pemenang
Pemenang Sayembare Base dait Kebudayan Sasak 2

SimpleWordPress

LEAVE A REPLY

Please enter your comment!
Please enter your name here