Pemikir Besar Bangsa Sasak
March 13, 2008
Kepemimpinan Skak Mat ala Sasak!
March 16, 2008

O gamax mase! O gamax tabeat!

O gamax mase! O gamax tabeat!

Ciceron sino penyaer Latin sax kebut gati, ye idup lex taon 43 Dexman Nabi Ise (43 DI). Sanget gati sedeh atene gitax kaum masene sax semele mele gawex ape juax sax ndex kenax. Pokoxne selapux dengan  nurutang kedeman mesax mesax. Kire kire marax masen te nane wah ruen dengan. Kerna ye seno pulitisi dit orator unggul, luwex gati perongkatan sax te bait kawih perajahan tipax ite pade. Salax sopox ongkatne sax kebut;
” O tempora! O mores!” arti Sasakne, O gamax mase! O gamax tabeat!

Semeton jari sax lex Gumi Selaparang, ndex obahne idup lex saman Ciceron seno. Coba serioxang pacu pacu masi ke luwex dengan mele ngaji sembahyang? Lamun masi pire dengan sax sembahyang, terus ne gawex ape sax te perentah six De Side Nenex Sax Kuwase? Pire dengan sax masi mele gitax kiri kawan, deket balen sax ndex maux mangan, sax sakit, sax anakne ndex besekole?. Terus pire luwex dengan sax bisang waktu beseneng seneng, begendang belex, begawe dit bekedekan?. Pire Tuan Guru sax ngajahan ngaji sejatine ngaji. Pire Tuan Guru sax boyax kepeng olexne jual ayat, atawe kelingkungang dengan agente paran paling digdaye terus te kultusang. Marax meno masyarakat ite lex saman sene. Kemakmuran sax te anteh anteh six dengan luwex, te bisang six komplotan, sak tesebut anggote dewan, pemerentah, Tuan Guru, LSM,ORMAS dit ape juax sax ndex mikirang kemakmuran dengan luwex.

Buktine wah betaon taon dengan Sasak ye kene kene dirix six busung lapar. Bilang mase gero, berelokan dengan dasan sax jaox pade mekir, lex kote. Dengan kote ye endah kepuse puse ne boyax pangan, sengax  selapux ajin kakenan seken mahal, pemete seken kurang. Ye ampoxne luwex gati bebajang, terune dit dedare Sasak, pade rarut bilin dese, bilang taon bebajang seno jari pekare lex gumin dengan sengax ndexne pade beduwe LIBAK (liwat jebak/Paspor). O gamax keluwex bebajang sax te buwi, luwex malik sax te bok bok terus te bolang ulex.

Maeh te pedasang pekare ape jax, sax jari lelasing selapux sax bekeleot bekelecang sene. Bangse Sasak, laex laex ye kebut gati jari bangse sax tuhu, pacu dit patut, lamun base agame Islam ye sax tesebut dengan Sholeh dit Tawakkal. Lagux nane jax seken luwex menuse seken terix bayun (wibawa) lex selak kekancean dait bangse sax lain. Luwex dengan olex bangse lain sax taox, pekare dengan Sasak seno maling, tukang beseang, sedax anak mesax, matex baturn dit lain lain. Arax sekecot sekecot dengan sax masi inget, mun dengan Sasak seno manuse sholeh, lagux keselem six kebut aran maling.

Dengan Sasak, semule jatin dengan taat berugame, leman dateng Islam lex gumi Sasak, manuse sax wix biadab jari dengan tadah, beduwe ilmu dit seken bersi. Kemajuan segowar gowarne bau ne palex. Wahne sax jari dengan Selam ampoxne seke maju peradapan lex gumi Selaparang seno. Lagux mule meno nasip menuse, lamun seke maju dex ne sax bagus doang seke luwex. Kelengean endah beriuk tiwox lex mbe juax, semeno juax dengan sax tepercayax, tehormatin marax base; Tuan Guru, inixne gawex pekare bingis tampe te ketaon six dengan luwex. Sengax selapux wah te lakar gawex (rekayasa), adexne sekedix sekedix bau te terimax dit te anggep biase six masyarakat.

Akah jati (akar persoalan) selapux sene, ye mulai olex ngkahne berentix lex Sareat sax biasen kawih jari tuntunan. Le x mase sene seken luwex dengan lupaang Al Qur’an, sengax mule wah te lakar suwe adexte pade suke rele ngelepas sareat seno. Kanak bajang wah luweaxan ndex ne tao base Sasak sax kenax dit tetu. Wah ndex ne taox berembe jage ruen kakenan dit kelambi kereng Sasak. Selapux dengan berarongan pade jari dengan gayebarux (modern).

Dengan sax ndot lex dasan dasan sax jaox lex tunggax gunung, lex sesongkang sedin gawah, lex dedoronan ape lex memontong, te bilin tais six kemajuan segale ruen. Lex taox seno masi te bau gitax berembe idup sene lampax ngiringin patoh (harmoni) asli (alam). Sengax selapux dengan sax teparan gawah seno masih ne kowat kowat berentix lex Sareat.

Ape seno sax teparan sareat, ye sino ajahan nurut agame Islam. Sax te mulai lex saman Gajah. Jari akah jati (inti) ajahan Slam seno ye tesebut Rahmatan lil alamin artine asex irox tipe selapuaxan isin gumi, ndex ne manuse doang, ndex ne jax dengan Slam doang , ndex ne jax sax idup doang lagu selapux ape juax mesti te tunang, te asih, te irox, te tersena. Anden selapux dengan Slam gawex prinsip seno, niscaye ambur gumi Selaparang six rezeki upax selapux dengan, terang six ilmu lex bilang bale bilang gubuk dengan.

Islam te jaux six Nabi Muhammad SAW. Ye arax lex gumi Mekah, lex jelo 20, bulan April taon 571 Wahne Ise (WI) . Kontex cerite Nabi suci seno jauxang ite Rahmah tipax selapuaxan dit Ye mesax jari turutan sax paling pantes te turut six dengan slam. Ye tesebut Uswatun Hasanah.

Nane sene lex gumi Selaparang dengan luwex pade kepusax, beboyax sai jax yax te dengah, sai yax jax te turut adex te pade rehayu (selamat sejahtera). Adexne jelap ngkah pekare lenge, busung lapar dit maling korupsi. Langan meno ite bau makmur dit bebajangte tiwox jari bangse sax mulie.

Lengan seno, bilang dengan mesti pedasang dengan dengan sax jari pemimpin atawe datu lex Gumi selaparang. Lamun ndexne terapang sifat sifat de Side Nabi SAW, dengan sino ndex sekali kali paut jari datunte.

Mene sifat sifat Nabino Seno:

1. Siddiq – Kenax atawe Tetu
De Side Nab ndex ne wah lekak mun bebase. Ndex ne wah gawex ape juax sax lenge.

2.Amanah – Jujur
De Side Nabi gawex selapux tugas dait kewajibanne tampe arax cacat.

3.Fatonah – Cerdas
De Side Nabi nutuxang selapux pekare tepat dit jelap/becat

4.Tabliq – bebadax ajah lex dengan luwex ape sax kenax dit tetu.

Wah sino Nabi endah kebut(terkenal) jari Menuse sax Sabar. Innallaha ma’asshobirin, Allah SWT barengin dengan sabar.

Arax sekex pesen De Side Nabi tipax ite ndah: ” Pade beriukm begawean jari m kawih lex dunie sene, marax dengan sax jax idup siyu taon dit beramal sholeh ntan m pade jari upax m lex aherat marax dengan sax jax mate lemak kelemax”

Aneh te pade beriux gawex,
selapux sax tesurux six agame,
dit te jaoxang dirix six pegawean sax lenge.
Wah seno kanggo te pedasang,
sai jax te pilex jari datu lemak jelo mudi.
Lamun ndexne cocok six sifat Nabi,
bau te sintat adexne nyedi…

Menu julux ndeh,

Nggax ne Nenex kaji sax kuwase doang sax paling taox

Sax ikhlas,

Hazairin R. JUNEP

Leave a Reply

Your email address will not be published. Required fields are marked *